Bëhu pjesë e grupimit më të madh të arkitektëve dhe urbanistëve shqiptarë në mbarë botën dhe së bashku të punojmë për të drejtat e arkitektëve shqiptarë në tokën e tyre dhe t’i përgjigjemi një kolonializmi të profesionit.

Jemi duke krijuar bashkimin e sa më shumë arkitektëve dhe urbanistëve shqiptarë në botë për të reaguar mbi mënyrën si përcaktohen projektet arkitektonike në Shqipëri, ligjshmërinë e tyre, financimin, shkatërrimin e zonave të mbrojtura dhe rrënimin e pasurive natyrore dhe kulturore shqiptare. Që së paku duke nisur nga viti 2013 vërejmë që në emër të “zhvillimit” betonizohet çdo pasuri natyrore me potencial ekonomik dhe turistik.

Për më tepër, siç dokumentohet në “The Albanian Files” me fjalët e vetë studiove, gjendemi përpara një realiteti të paimagjinueshëm: një grup i ngushtë arkitektesh të huaj kontaktohet drejtpërdrejt nga zyra e Kryeministrit dhe merr projekte pa procedurë konkurruese. Këto janë projekte private dhe publike. Vërejmë një bashkëpunim midis arkitektit, privatit dhe kryeministrit ku dakordohet arkitekti i përcaktuar nga vetë kryeministri.

Një nga rastet më të pabesueshme është ai i arkitektit Chris Precht, i cili deklaron në “The Albanian Files” se është kontaktuar nga vetë kryeministri nëpërmjet një mesazhi në Instagram. Ky arkitekt ka projektuar kopshtin Eden brenda kryeministrisë, për të cilin janë shpenzuar rreth 4.7 milionë euro nga taksat për ndërtimin (kontratë me firmën Fusha shpk), ndërsa pagesa për projektimin e studios Precht nuk gjendet askund në thesarin e shtetit. I njëjti arkitekt ka disa projekte të tjera në Shqipëri.

Ky mekanizëm është aplikuar në të gjithë territorin e Republikës së Shqipërisë, në projekte private dhe publike.

Për ne ky është një kolonializëm i profesionit të arkitektit shqiptar: nga 61 studio të huaja të përfshira në “The Albanian Files”, asnjë arkitekt apo urbanist shqiptar nuk shfaqet si Drejtues Projekti. Ky përjashtim sistematik përbën një precedent të rrezikshëm për të gjithë arkitektët shqiptarë.

Nismat tona do t’u drejtohen institucioneve publike shqiptare si edhe atyre evropiane. Do të vihen në dijeni Këshilli Evropian i Arkitektëve (ACE) dhe të gjitha institucionet e interesuara publike të shteteve përkatëse të arkitektëve të përfshirë në projekte publike të dyshimta në Shqipëri, të dokumentuara gjithashtu në “The Albanian Files”.